Përcaktimi i produktit tonë kafe ARGJIRO, si "Kafe Tradicionale Shqiptare" është një nocion i ri, i cili u përdor për herë të parë nga firma jonë që prej 1995 dhe lidhet me veçantinë e këtij produkti si dhe me prezantimin e tij si një tip tjetër kafeje , në tregun Grek.
  Që atëherë e deri me sot, ky nocion po  përdoret pothuajse nga të gjithë shqiptarët, në vënd të nocionit të vjetër, “kafe turke”.
  Shumë na pyesin, ç’është kafeja shqiptare dhe nëse ka lidhje me ekzistencën e plantacioneve të kultivimit të kafes, në Shqipëri.
  Përdorimi i nocionit "Kafe Tradicionale Shqiptare" ka lidhje me metodën tradicionale shqiptare, të përpunimit(pjekje dhe bluarje), bërjes dhe pirjes së kafes nga shqiptarët që në vitet e hershme të hyrjes së kafes në Shqipëri.
 Kafeja jeshile kultivohet vetëm në Brazili dhe në vendet e Amerikës Latine dhe që andej shpërndahet në të gjithë botën. Çdo shtet ka traditën e vet në mënyrën përpunimit, të bërjes dhe të pirjes së kafes. Sipas traditës së çdo vendi, kemi dhe ekzistencën e tipeve të ndryshme të kafeve.
  Kafeja tradicionale shqiptare edhe ajo greke hyjnë në të njëjtën familje dhe shpesh quhen dhe kafe turke për nga fakti se, kafeja si produkt, ka hyrë për herë të parë në zonën e Ballkanit nga turqit, gjatë pushtimit otoman, të cilët pasi e piqnin dhe e bluanin kafen, për bërjen e një kafeje përdornin xhezve prej bakri mbi një vatër të nxehtë dhe për pirjen e saj përdornin kupa të vogla që quheshin filxhane. Në ato kohëra kafeja ishte e rrallë dhe e shtrenjtë dhe pihej kryesisht nga sulltenjtë dhe të kamurit turq, për t’i mbajtur ata të zgjuar gjatë betejave.
   Me kalimin e kohërave kafeja filloi të përdoret dhe nga ballkanasit, të cilët dhe sot e kësaj dite, e përgatisin dhe e pinë atë me të njëjtën metodë që e bënin turqit, prandaj në rang botëror kjo lloj kafe njihet si kafe turke.
Megjithatë  ndërkohë që si  metodë mbetet e  njejtë,  ka ndryshime të theksuara midis vendeve të ndryshme të rajonit, në mënyrën dhe preferencat e përgatitjes së kafes.
  Kjo ishte dhe arsyeja që ne e veçantuam produktin tonë Kafe ARGJIRO,duke e karakterizuar atë si  KafeTradicionale Shqiptare. 
  Sot, midis kafes tradicionale shqiptare dhe asaj greke ka ndryshime të theksuara në shije dhe në aromë, që vijne si rezultat i mënyrave të ndryshme të pjekjes , të bluarjes, si dhe të llojeve të kafeve jeshile që përdoren në përgatitjen e harmaneve të tyre.
 Kafeja tradicionale shqiptare ka pjekje shumë të errët drejt të zezës , bluarje shumë më të hollë dhe në përgatitjen e harmanit të saj duhen përdorur dhe sasi të caktuara të kafeve jeshile 100% arabica, kafe që përdoren zakonisht për ekspressin, prandaj dhe shija e saj është pak e ngjashme me atë të ekspressit.       Ndërkohë kafeja greke ka pjekje shumë më të hapur, bluarje pak më të trashë dhe në përgatitjen e harmanit të saj , nuk është domosdoshme përdorimi i sasive të caktuara të kafeve jeshile 100% arabica që përdoren për ekspressin.
  Mënyra e përpunimi të kafes shqiptare i afrohet më tepër metodës së hershme të përgatitjes së kafes nga turqit ,kurse ajo e kafes greke është një metodë më e re përpunimi, e cila përdoret 50 vitet e fundit dhe vetëm nga Grekët.
  Aroma dhe shija e kafes shqiptare është më e fortë se asaj greke,, ndërkohë, kafeja greke ka shije dhe aromë shumë më të lehtë dhe pak të tharët ,krejtësisht të veçantë dhe të pakrahasueshme me llojet e tjera të kafeve.
  Këto ndryshime janë përcaktuese gjithashtu dhe në shpejtësinë e konsumimit të kafes .
 Për bërjen e një kafeje shqiptare, për shkak të shijes së saj të fortë, përdoret shumë pak sasi kafeje në xhezve, pothuajse gjysma e sasisë së kafes që përdoret për bërjen e një kafeje greke. Si rezultat i kësaj, kafeja shqiptare konsumohet shume me ngadale se kafeja greke dhe me 100gr kafe shqiptare mund bëjmë rreth 15-20 kafe. Për arsyet e mësipërme kjo lloj kafeje konsiderohet si me shëndetshme dhe me kosto shumë më të ulët për konsumatorin, në krahasim dhe me të gjitha llojet tjera të kafeve.
 Ndërkohë kafeja greke për shkak të shijes së saj të lehtë, konsumohet shumë më shpejt dhe me 100gr kafe greke mund të bëjmë deri në 7-8 kafe.
  Zakonisht kur kafeja piqet e errët drejt të zezës, eliminon krejtësisht thartësinë e saj, fiton pak ëmbëlsi, pak hidhërim dhe çliron një shije dhe aromë më të fortë ,të cilat i ruan për një periudhë  të gjatë kohe dhe nuk vjetërsohet lehtë.
  Bluarja e imët ndihmon në çlirimin e plotë të aromës së kafes dhe bëhet dhe shkak për krijimin e ajkës si dhe mosngeljen e mbeturinave në filxhan.
 Ky lloj përpunimi i kafes çon dhe në eleminimin më të plotë të elementëve të dëmshëm të kafes jeshile. Gjatë këtij lloj përpunimi, kafeja humbet më tepër në peshë, me një firo të lartë rreth 22%, dhe si rezultat i kësaj, plotësimi i 100gr. kafe(pesha e një qeske) bëhet me më tepër kafe, si masë.
 Për të arritur rezultatin e duhur, për një kafe të shijshme tradicionale shqiptare, rol të rëndësishëm, përveç mënyrës së përpunimit, luajnë përzgjedhja dhe kontrolli i cilësisë së kafes jeshile si dhe kombinim i saktë i llojeve të ndryshme të kafeve jeshile nga zona të ndryshme të kultivimit.
 Krijimin e një harmani të caktuar përcakton dhe veçantinë e shijes dhe aromës së kafes që çdo firmë ka vendosur të ofrojë .
 Gjithashtu pjekja duhet të arrije gradën e duhur pa kaluar në djegien e kafes dhe çdo gjë duhet bërë me merak duke ruajtur gjithmonë stabilitetin e standarteve të zgjedhura.
Ky është dhe lloji i kafes që pëlqehet më tepër nga shqiptarët, në këtë mënyrë bëhet dhe përpunimi i produktit tonë , Kafe ARGJIRO, prandaj dhe ne vendosëm t’a karakterizojmë atë, si Kafe Tradicionale Shqiptare.
 Thuhet që edhe grekët shumë vite përpara pinin të njëjtën kafe që pinë shqiptarët sot dhe e quanin atë, kafe turke. Sot ,shumë konsumatorë grek e përziejnë kafen ARGJIRO me atë greke për ti dhënë kësaj të fundit një tonalitet më tepër, në shije dhe aromë, duke e bërë atë pak më të shijshme.